LPC 1580


    ໃນວັນທີ 8 ມັງກອນ 2019 ສານປະຊາຊົນສູງສຸດໄດ້ຈັດປາຖະກະຖາຫວນຄືນມູນເຊື້ອວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ (20/1/1949 - 20/1/2019) ໃຫ້ກຽດຂຶ້ນເຜີຍແຜ່ມູນ ເຊື້ອວັນສ້າງຕັ້ງກອງທັບປະຊາຊົນລາວໂດຍ ທ່ານ ພົນຈັດຕະວາ ສົມພອນ ແກ້ວມີໄຊ ປະທານສະຫະພັນນັກຮົບເກົ່າແຫ່ງຊາດ ໂດຍການເຂົ້າຮ່ວມຮັບຟັງຂອງ ທ່ານ ຄຳພັນ ສິດທິດຳພາ ປະທານສານປະຊາຊົນສູງສຸດພ້ອມຄະນະ ແລະ ພະນັກງານເຂົ້າຮ່ວມຮັບຟັງ.

    ທ່ານ ພົນຈັດຕະວາ ສົມພອນ ແກ້ວມີໄຊ ໄດ້ຍົກໃຫ້ຮູ້ເຖິງຄວາມໝາຍສຳຄັນຂອງການກຳເນີດ ແລະ ເຕີບໃຫຍ່ຂະຫຍາຍຕົວຂອງກອງທັບປະຊາຊົນລາວວ່າ: ເພື່ອຕອບສະໜອງຕາມຄວາມຮຽກຮ້ອງຕ້ອງການຂອງສະພາບການກໍຄື: ຂະບວນການປະຕິວັດຕໍ່ສູ້ກູ້ຊາດຂອງປະຊາຊົນລາວບັນດາເຜົ່າຜູ້ທີ່ຮັກຊາດ ກອງທັບປະຊາຊົນລາວ ໄດ້ຮັບການສ້າງຕັ້ງຂຶ້ນໃນວັນທີ 20 ມັງກອນ 1949, ຜ່ານຍ່ານທາງແຫ່ງການສ້າງຕັ້ງ, ສູ້ຮົບມີໄຊ ແລະ ເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງໃນດ້ານການຕໍ່ສູ້ ພາຍໃຕ້ການຊີ້ນຳ-ນຳພາ ອັນສະຫຼາດສ່ອງໃສຂອງພັກປະຊາຊົນປະຕິວັດລາວ ແລະ ເຮັດໃຫ້ກອງທັບປະຊາຊົນລາວ ໄດ້ກາຍເປັນກຳລັງຫຼັກແຫຼ່ງໃນສົງຄາມຕໍ່ສູ້ເພື່ອປົດປ່ອຍຊາດ ທັງເຕີບໃຫຍ່ເຂັ້ມແຂງທາງດ້ານປະລິມານ ແລະ ຄຸນນະພາບ, ຍິ່ງຕີຍິ່ງໄດ້ຮັບໄຊຊະນະ ແລະ ຍິ່ງຕີຍິ່ງມີຄວາມເຂັ້ມແຂງ, ມີບົດຮຽນໃນການສູ້ຮົບ, ມີຄວາມເດັດດ່ຽວ ໜຽວແໜ້ນ ແລະ ພິລະອາດ ຫານອົງອາດກ້າແກ່ນ, ສາມາດຕີເອົາຊະນະພວກຈັກກະພັກລ່າເມືອງຂຶ້ນແບບເກົ່າ ແລະ ພວກຈັກກະພັດລ່າເມືອງຂຶ້ນແບບໃໝ່ ພ້ອມດ້ວຍລູກແຫຼ້ງຕີນມືຂອງພວກເຂົາ ຈົນສາມາດນຳເອົາປະເທດຊາດປົດປ່ອຍອອກຈາກແອກຄອບຄອງຂອງພວກຈັກກະພັດໄດ້ຢ່າງສົມບູນ ແລະ ສະຖາປະນາ ສປປ ລາວ ຂຶ້ນໃນວັນທີ 2 ທັນວາ 1975 ຢ່າງສະຫງ່າ. ເພື່ອເສີມຂະຫຍາຍມູນ ເຊື້ອ ແລະ ທາດແທ້ຂອງວັນສຳຄັນດັ່ງກ່າວ, ໂດຍ ທ່ານ ພົນຈັດຕະວາ ສົມພອນ ແກ້ວມີໄຊ ຍັງໄດ້ເນັ້ນໜັກໃຫ້ສະມາຊິກພັກພະນັກງານ-ລັດຖະກອນ ສານປະຊາຊົນສູງສຸດ ສືບຕໍ່ສຶກສາຮຽນຮູ້ປະຫວັດມູນເຊື້ອວິລະກຳ ໃນພາລະກິດຕໍ່ສູ້ປົດປ່ອຍປະເທດຊາດຂອງກອງທັບປະຊາຊົນລາວ ໃນແຕ່ລະຍຸກແຕ່ລະສະໄໝ ເພື່ອນຳໄປໝູນໃຊ້ເຂົ້າໃນຂົງເຂດວຽກງານຂອງຕົນຮັບຜິດຊອບ.

 

ຂ່າວ: ອານຸພົນພົມຮັກສາ