DSC 0034


DSC 0008


      ພິທີ ປະກາດແຕ່ງຕັ້ງ ປະທານສານປະຊາຊົນ ເຂດ 2 ແຂວງໄຊຍະບູລີ, ໃນວັນທີ 23 ເມສາ 2018 ທີ່ຜ່ານມານີ້ ສານປະຊາຊົນ ເຂດ 2 ຢູ່ທີ່ສະໂມສອນຫ້ອງວ່າການປົກຄອງເມືອງປາກລາຍ ໂດຍການເປັນກຽດເຂົ້າຮ່ວມຂອງ ທ່ານ ຄໍາພັນ ສິດທິດໍາພາ ກຳມະການສູນກາງພັກ ປະທານສານປະຊາຊົນສູງສຸດ, ມີທ່ານ ບຸນລັບ ແສງອາພອນ ເລຂາພັກເມືອງ ເຈົ້າເມືອງປາກລາຍ, ປະທານສານປະຊາຊົນແຂວງ, ຮອງປະທານສານປະຊາຊົນແຂວງ, ສານປະຊາຊົນເຂດ, ຜູ້ພິພາກສາ, ຜູ້ຊ່ວຍພິພາກສາ ຕະຫຼອດຮອດພະນັກງານ - ລັດຖະກອນສານປະຊາຊົນແຂວງ ແລະ ສານປະຊາຊົນເຂດເຂົ້າຮ່ວມ.

        ໃນພິທີດັ່ງກ່າວ ໄດ້ຜ່ານມະຕິຕົກລົງ ຂອງຄະນະປະຈຳສະພາ ແຫ່ງຊາດ ວ່າດ້ວຍ ການແຕ່ງຕັ້ງ ປະທານສານປະຊາຊົນ ເຂດ 2 ແຂວງໄຊຍະບູລີ, ຄະນະປະຈໍາສະພາແຫ່ງຊາດ ຕົກລົງ ແຕ່ງຕັ້ງ ທ່ານ ນາງ ນະພາພອນ ພົງໄທ ຮັກສາການປະທານສານປະຊາຊົນເຂດ II ແຂວງໄຊຍະບູລີ ເປັນ ປະທານ ສານປະຊາຊົນ ເຂດ II ແຂວງໄຊຍະບູລີ, ມອບໃຫ້ສານປະຊາຊົນສູງສຸດ, ສານປະຊາຊົນ ເຂດ II ແຂວງໄຊຍະບູລີ, ພາກສ່ວນທີ່ກຽ່ວຂ້ອງ, ຜູ້ຖືກແຕ່ງຕັ້ງ ຈົ່ງຮັບຮູ້ ແລະ ຈັດຕັ້ງປະຕິບັດ ມະຕິສະບັບນີ້ຢ່າງເຂັ້ມງວດ.

        ໃນຕອນທ້າຍຂອງພິທີດັ່ງກ່າວ ທ່ານຄຳພັນ ສິດທິດຳພາ ປະທານສານປະຊາຊົນສູງສຸດ ໄດ້ເນັ້ນໜັກໃຫ້ບັນດາທ່ານ ທີ່ຖຶກແຕ່ງຕັ້ງຈົ່ງເອົາໃຈໃສ່ເຮັດໜ້າທີ່ຂອງຕົນດ້ວຍຄວາມປອດໃສຍຸຕິທຳ ບໍ່ສວຍໃຊ້ໜ້າທີ່ ຕຳແໜ່ງ ສິດອຳນາດ ເພື່ອຫາຜົນປະໂຫຍດໃຫ້ແກ່ຕົນເອງ ຫຼືຍາດພີ່ນ້ອງ ບໍ່ບັງຄົບນາບຂູ່ ປະຕິບັດສິດໜ້າທີ່ເກີນຂອບເຂດ ຫຼືລະເມີດລະບຽບການດຳເນີນຄະດີ ບໍ່ລຳອຽງເຂົ້າຂ້າງອອກຂາ ທີ່ພາໃຫ້ການຕັດສິນຄະດີ ບໍ່ຍຸຕິທຳ ບໍ່ກັກສຳນວນຄະດີ ກົດໜ່ວງເອກະສານ ປິດບັງຊຸກເຊື່ອງເອກະສານ ຫຼືຫຼັກຖານຢູ່ໃນສຳນວນຄະດີ ແລະ ພ້ອມກັນເຮັດໜ້າທີ່ຂອງຕົນດ້ວຍຄວາມຮັບຜິດຊອບ ເຮັດໃຫ້ວຽກງານສານປະຊາຊົນໄດ້ຮັບຄວາມໄວ້ວາງໃຈຈາກປະຊາຊົນ.

 

ນາມປາກກາ : SK