DSC 0194


DSC 0222


      ພິທີ ປະກາດແຕ່ງຕັ້ງ ຮອງປະທານ, ຜູ້ພິພາກສາ ສານປະຊາຊົນເຂດ 3 ຕອນເຊົ້າຂອງວັນທີ 25 ເມສາ 2018 ທີ່ຜ່ານມານີ້ ສານປະຊາຊົນ ເຂດ 3 ຢູ່ທີ່ສະໂມສອນຂອງເມືອງຊະນະຄາມ ໂດຍການເປັນກຽດເຂົ້າຮ່ວມຂອງ ທ່ານ ຄໍາພັນ ສິດທິດຳພາ ກຳມະການສູນກາງພັກ ປະທານສານປະຊາຊົນສູງສຸດ, ມີທ່ານ ອຸດົມ ພົມມະລິນ ປະທານສານປະຊາຊົນ ແຂວງວຽງຈັນ ມີທ່ານ ສະໝານ ວິເສດຍະພົງ ເລຂາພັກເມືອງ ເຈົ້າເມືອງຊະນະຄາມ ມີກຳມະການພັກເມືອງ ຫົວໜ້າຫ້ອງການ ພະນັກງານວິຊາການທີ່ກຽ່ວຂ້ອງກໍ່ເປັນກຽດເຂົ້າຮ່ວມຢ່າງພ້ອມພຽງ.

        ໃນພິທີດັ່ງກ່າວ ໄດ້ຜ່ານມະຕິຕົກລົງ ຂອງຄະນະປະຈຳສະພາ ແຫ່ງຊາດ ວ່າດ້ວຍ ການແຕ່ງຕັ້ງ ຮອງປະທານ ສານປະຊາຊົນ ເຂດ 3 ແຂວງວຽງຈັນ, ຄະນະປະຈໍາສະພາແຫ່ງຊາດ ຕົກລົງ ແຕ່ງຕັ້ງ ທ່ານ ຄໍາຜາຍ ກິ່ງສະອອນຈັນ ຜູ້ພິພາກສາ ຄະນະສານອາຍາ ເປັນຮອງ ປະທານ ສານປະຊາຊົນ ເຂດ 3 ແຂວງວຽງຈັນ, ມອບໃຫ້ສານປະຊາຊົນສູງສຸດ ສານປະຊາຊົນເຂດ 3 ແຂວງວຽງຈັນ, ພາກສ່ວນທີ່ກຽ່ວຂ້ອງ, ຜູ້ຖືກແຕ່ງຕັ້ງ ຈົ່ງຮັບຮູ້ ແລະ ຈັດຕັ້ງປະຕິບັດ ມະຕິສະບັບນີ້ຢ່າງເຂັ້ມງວດ ແລະ ພ້ອມກັນນີ້ໃນພິທີດັ່ງກ່າວ ຍັງໄດ້ຜ່ານມະມິຂອງ ຄະນະປະຈຳສະພາແຫ່ງຊາດ ວ່າດ້ວຍການແຕ່ງຕັ້ງຜູ້ພິພາກສາ ສານປະຊາຊົນເຂດ 3 ແຂວງວຽງຈັນ, ຄະນະປະຈຳສະພາແຫ່ງຊາດຕົກລົງແຕ່ງຕັ້ງ ທ່ານ ສາຍຍັນ ຄຳພັກດີ ຜູ້ຊ່ອຍ ຜູ້ພິພາກສາ ເປັນຜູ້ພິພາກສາຊັ້ນ 1 ຂັ້ນ 4 ປະຈຳຢູ່ສານປະຊາຊົນ ເຂດ 3 ແຂວງວຽງຈັນ ມອບໃຫ້ສານປະຊາຊົນສູງສຸດ ສານປະຊາຊົນເຂດ 3 ແຂວງວຽງຈັນ, ພາກສ່ວນທີ່ກຽ່ວຂ້ອງ, ຜູ້ຖຶກແຕ່ງຕັ້ງ ຈົ່ງຮັບຮູ້ ແລະ ຈັດຕັ້ງປະຕິບັດ ມະຕິສະບັບນີ້ຢ່າງເຂັ້ມງວດ.

        ໃນຕອນທ້າຍຂອງພິທີດັ່ງກ່າວ ທ່ານຄຳພັນ ສິດທິດຳພາ ປະທານສານປະຊາຊົນສູງສຸດ ໄດ້ເນັ້ນໜັກໃຫ້ບັນດາທ່ານ ທີ່ຖຶກແຕ່ງຕັ້ງຈົ່ງເອົາໃຈໃສ່ເຮັດໜ້າທີ່ຂອງຕົນດ້ວຍຄວາມປອດໃສຍຸຕິທຳ ບໍ່ສວຍໃຊ້ໜ້າທີ່ ຕຳແໜ່ງ ສິດອຳນາດ ເພື່ອຫາຜົນປະໂຫຍດໃຫ້ແກ່ຕົນເອງ ຫຼືຍາດພີ່ນ້ອງ ບໍ່ບັງຄົບນາບຂູ່ ປະຕິບັດສິດໜ້າທີ່ເກີນຂອບເຂດ ຫຼືລະເມີດລະບຽບການດຳເນີນຄະດີ ບໍ່ລຳອຽງເຂົ້າຂ້າງອອກຂາ ທີ່ພາໃຫ້ການຕັດສິນຄະດີ ບໍ່ຍຸຕິທຳ ບໍ່ກັກສຳນວນຄະດີ ກົດໜ່ວງເອກະສານ ປິດບັງຊຸກເຊື່ອງເອກະສານ ຫຼືຫຼັກຖານຢູ່ໃນສຳນວນຄະດີ ແລະ ພ້ອມກັນເຮັດໜ້າທີ່ຂອງຕົນດ້ວຍຄວາມຮັບຜິດຊອບ ເຮັດໃຫ້ວຽກງານສານປະຊາຊົນໄດ້ຮັບຄວາມໄວ້ວາງໃຈຈາກປະຊາຊົນ.

 

ນາມປາກກາ : ສາຍນ້ຳຂອງ