IMG 2708


   ໃນວັນທີ 6 ມິຖຸນາ 2017, ທ່ານ ຄຳພັນ ສິດທິດຳພາ, ກຳມະການສູນກາງພັກ, ປະທານສານປະຊາຊົນ ສູງສຸດ ແຫ່ງ ສປປ ລາວ ພ້ອມຄະນະ 2 ທ່ານໄດ້ອອກເດີນທາງ ເພື່ອເຂົ້າຮ່ວມກອງປະຊຸມຜູ້ພິພາກສາ ຈີນ-ອາຊຽນ ຄັ້ງທີ II ຊຶ່ງຈັດຂຶ້ນໃນວັນທີ 7-8 ມິຖຸນາ 2017 ທີ່ນະຄອນນານໜິງ, ເຂດປົກຄອງຕົນເອງ ກວາງຊີ, ສປ ຈີນ ຊຶ່ງມີຜູ້ ເຂົ້າຮ່ວມຈາກ ສປ.ຈີນ-ອາຊຽນ, ອາຊີໃຕ້ ຫລາຍກວ່າ 100 ທ່ານ.
    ກອງປະຊຸມຄັ້ງນີ້ ມີຈຸດປະສົງເພື່ອແລກປ່ຽນບົດຮຽນ ແລະ ຍົກສູງຄຸນນະພາບ ການຮ່ວມມືສາກົນໃນຂົງ ເຂດກົດໝາຍ ເພື່ອສົ່ງເສີມໃຫ້ຄວາມຮູ້ກົດໝາຍ, ການແລກປ່ຽນບົດຮຽນຂອງຜູ້ພິພາກສາ, ວຽກງານຕຸລາການ, ກົນ ໄກການແກ້ໄຂຂໍ້ຂັດແຍ່ງ, ແລກປ່ຽນບົດຮຽນໃນການນຳໃຊ້ຂໍ້ມູນຂ່າວສານ ແລະ ການດໍາເນີນຄະດີຜ່ານລະບົບ ອິນເຕິເນັດ. ນອກຈາກນີ້ ກອງປະຊຸມໄດ້ເໜັ້ນໃສ່ຍົກສູງຄວາມສາມາດ ແລະ ຄວາມໂປ່ງໄສໃນ ອົງການຕຸລາການ; ແລະ ກົນໄກການແກ້ໄຂຂໍ້ຂັດແຍ່ງທາງແພ່ງ, ເສດຖະກິດ ແລະ ການຄ້າ ເພື່ອກະກຽມໃຫ້ ກັບການເຊື່ອມຈອດ ສປ ຈີນ-ອາຊຽນ ຕາມໂຄງການ ໜຶ່ງແລວທາງໜຶ່ງເສັ້ນທາງຊຶ່ງ ທ່ານ ຄຳພັນ ສິດທິດຳພາ, ປະທານສານປະຊາຊົນ ສູງສຸດ ແຫ່ງ ສປປ ລາວ ໄດ້ສະແດງຄວາມຊົມເຊີຍ ແລະ ສະໜັບສະໜູນໂຄງການໜຶ່ງແລວທາງໜຶ່ງເສັ້ນທາງທ່ານ ຍັງມີຄຳເຫັນຕໍ່ກອງປະຊຸມບາງຕອນວ່າໃນຍຸກໂລກາພິວັດ, ການເຊື່ອມຕົວຂອງພາກພື້ນ ແລະ ສາກົນ ນີ້ ທຸກປະເທດ ຕ້ອງໄດ້ເພິ່ງພາອາໃສກັນ ແລະ ກັນ  ເຖິງແມ່ນວ່າການເຊື່ອມຕົວເຂົ້າກັນ ຈະນຳຄຸນປະໂຫຽດສູງສຸດ ຮ່ວມກັນຢ່າງມະຫາສານມາໃຫ້ປະເທດຊາດ, ພາກພື້ນ ແລະ ສາກົນ ກໍຕາມ, ແຕ່ໃນຄະນະດຽວກັນນັ້ນ ບັນຫາຫຍໍ້ ທໍ້ ແລະ ອຸປະສັກ ກໍເກີດຂຶ້ນຢ່າງປະຕິເສດບໍ່ໄດ້. ມີແຕ່ການແລກປ່ຽນບົດຮຽນ, ຊ່ວຍເຫຼືອເຊິ່ງກັນ ແລະ ກັນ ເທົ່ານັ້ນ ຈຶ່ງຊ່ວຍໃຫ້ອົງການຕຸລາການໃນແຕ່ລະປະເທດ, ພາກພື້ນ ແລະ ສາກົນ ມີຄວາມເຂັ້ມແຂງ, ມີຄຸນນະພາບ ແລະ ຍົກສູງປະສິດທິພາບໃຫ້ວຽກຂອງສານ, ຮັບປະກັນການພິຈາລະນາຕັດສິນຄະດີ ມີຄວາມວ່ອງໄວ, ໂປ່ງໄສ, ຖືກ ຕ້ອງ ແລະ ຍຸຕິທຳ.”
    ພິເສດ ທ່ານ ຄຳພັນ ສິດທິດຳພາ, ປະທານສານປະຊາຊົນສູງສຸດ ແຫ່ງ ສປປ ລາວ ໄດ້ຮັບກຽດຕາງໜ້າໃຫ້ ກັບປະທານສານສູງສຸດ ອາຊຽນ ມີຄຳເຫັນຕໍ່ພິທີເປີດສູນສູນແລກປ່ຽນ ແລະ ຝຶກອົບຮົມຜູ້ພິພາກສາ, ສູນຄົ້ນຄວ້າ ການຊ່ວຍເຫຼືອຕຸລາການສາກົນ ແລະ ສູນກາງຂໍ້ມູນຂ່າວສານກົດໝາຍ ແລະ ວຽກງານຕຸລາການ ສປ ຈີນ-ອາຊຽນແລະ ເປີດຜ້າຄຸມສູນດັ່ງກ່າວ ຢ່າງເປັນທາງການ ຮ່ວມກັບປະທານສານປະຊາຊົນສູງສຸດ ແຫ່ງ ສປ.ຈີນ ແລະ ເຈົ້າ ແຂວງກວາງຊີ
      ໂດຍປະຕິບັດຕາມທິດ 4 ດີ ແລະ ຄູ່ຮ່ວມມືຍຸດທະສາດຮອບດ້ານຍາວນານ; ໃນໂອກາດທີ່ເຂົ້າຮ່ວມກອງ ປະຊຸມໃນຄັ້ງນີ້ ປະທານສານປະຊາຊົນສູງສຸດຂອງສອງປະເທດ ສປປ ລາວ - ສປ.ຈີນ  ຍັງໄດ້ພົບປະສອງຝ່າຍ ແລະ ສຳເລັດການລົງນາມໃນບົດບັນທຶກຄວາມເຂົ້າໃຈສອງຝ່າຍ ຊຶ່ງເປົ້າໝາຍແມ່ນ ເພື່ອສົ່ງເສີມການຮ່ວມມືວິຊາ ການ, ແລກປ່ຽນການຢ້ຽມຢາມຂອງຄະນະຜູ້ແທນສອງສານປະຊາຊົນ. ໃນຕອນທ້າຍປະທານສານປະຊາຊົນສູງ ສຸດ ແຫ່ງ ສປ.ຈີນ ຍັງສະແດງຄວາມຍິນດີທີ່ຈະໃຫ້ການຊ່ວຍເຫຼືອ ຄະນະຜູ້ແທນສານປະຊາຊົນສູງສຸດ ແຫ່ງ ສປປ ລາວ ເພື່ອໄປຖອດຖອນບົດຮຽນທີ່ ສປ.ຈີນ ໃນການສ້າງກົດໝາຍລັດຖະກອນຕຸລາການ ຕື່ມອີກ.
     ພາຍຫຼັງສິ້ນສຸດການປະຊຸມ ເຈົ້າພາບໄດ້ນຳພາຄະນະຜູ້ແທນທ່ຽວຊົມວັດທະນະທຳທ້ອງຖິ່ນ, ຄວາມສວຍ ງາມຂອງທຳມະຊາດ ແລະ ແຫຼ່ງທ່ອງທ່ຽວທີ່ມີຊື່ສຽງຂອງເມືອງກຸຍລິງ ຊຶ່ງສຳພັດໄດ້ເຖິງການດຳລົງຊີວິດ, ຄວາມ ງາມຂອງທຳມະຊາດທ້ອງຖິ່ນ, ຄວາມກົມກືນຂອງທຳມະຊາດ ແລະ ພັດທະນາສະໄໝໃໝ່ ຂອງ ສປ.ຈີນ.
      ຄະນະຜູ້ແທນໄດ້ຮັບຄວາມເອົາໃຈໃສ່ດ້ວຍໄມຕີຈິດ, ມິດຕະພາບ ຢ່າງດີເລີດ ແລະ  ເດີນທາງກັບຄືນປະ ເທດໃນວັນທີ 11 ມິຖຸນາ 2017 ດ້ວຍຜົນສຳເລັດອັນຈົບງາມທຸກປະການ.