DSC 1033


DSC 1030 

     ໃນວັນທີ 6 ຕຸລາ 2016, ສະມາຄົມມິດຕະພາບ ລາວ-ສປປ ເກົາຫຼີ ຮ່ວມກັບ ສະຖານເອກອັກຄະລັກຖະທູດແຫ່ງ ສ ປປ ເກົາຫຼີ ປະຈຳ ສປປ ລາວ ໄດ້ຈັດປາຖະກາຖາ, ສາຍວີດີໂອ ແລະ ວາງສະແດງຮູບພາບ ເພື່ອສະເຫຼີມສະຫຼອງວັນສ້າງຕັ້ງພັກແຮງງານເກົາຫຼີ ຄົບາຮອບ 71 ປີ (10/10/1945-10/10/2016) ທີ່ສະໂມສອນຂອງ ອົງການໄອຍະການ ປະຊາຊົນສູງສຸດ, ນະຄອນຫຼວງວຽງຈັນ. ໃຫ້ກຽດເຂົ້າຮ່ວມໃນພິທີດັ່ງກ່າວມີ ສະຫາຍ ຄຳພັນ ສິທິດຳພາ, ກຳມະການສູນກາງພັກ, ປະທານ ສານປະຊາຊົນສູງສຸດ, ຮອງປະທານສະມາຄົບມິດຕະພາບ ລາວ-ສປປ ເກົາຫຼີ, ສະຫາຍ ລີຊາງກູນ, ເອກອັກຄະລັດຖະທູດວິສາມັນ ຜູ້ມີອຳນາດເຕັມແຫ່ງ ສປປ ເກົາຫຼີ ປະຈຳ ສປປ ລາວ. ພ້ອມດ້ວຍບັນດາຫົວໜ້າຫ້ອງການ, ຫົວໜ້າກົມ, ພະນັກງານຈາກສານປະຊາຊົນສູງສຸດ ເຂົ້າຮ່ວມຟັງຢ່າງພ້ອມພຽງ.

          ສະຫາຍ ລີຊາງກູນ, ເອກອັກຄະລັດຖະທູດ ວິສາມັນຜູ້ທີ່ມີອຳນາດເຕັມໄດ້ໃຫ້ກ່ຽດກ່າວປາຖະກະຖາໂດຍໄດ້ຍົກໃຫ້ເຫັນເຖິງ ພາລະກິດແຫ່ງການຕໍ່ສູ້ອັນພິລະອາດຫານ ຂອງປະຊາຊົນ ໃນໄລຍະປົດປ່ອຍຊາດ ກໍຄື ການປົກປັກຮັກສາ ແລະ ການສ້າງສາພັດທະນາ ສປປ ເກົາຫຼີ ໃນປັດຈຸບັນພາຍໃຕ້ການນຳພາອັນສະຫຼາດສ່ອງໃສ ຂອງພັກແຮງງານ ເກົາຫຼີ ເຮັດໃຫ້ ສປປ ເກົາຫຼີ ມີບາດກ້າວຂະຫຍາຍຕົວຢ່າງໜັກແໜ້ນເພື່ອກ້າວຂຶ້ນສູ່ສັງຄົມນິຍົມທີ່ເຂັ້ມແຂງ ຢ່າງບໍ່ຢຸດຢັ້ງ, ອັນພົ້ນເດັ່ນແມ່ນ ສປປ ເກົາຫຼີ ມີຄວາມກ້າວໜ້າທາງດ້ານວິທະຍາສາດເຕັກ ໂຍໂລຊີ, ມີສະຖຽນລະພາບທາງດ້ານການເມືອງ, ເສດຖະກິດຂະຫຍາຍຕົວຢ່າງຕໍ່ເນື່ອງ, ສັງຄົມມີຄວາມ ສີວິໄລ, ຊີວິດການເປັນຢູ່ ຂອງປະຊາຊົນ ນັບມື້ໄດ້ຮັບການປັບປຸງໃຫ້ດີຂຶ້ນ.

          ພ້ອມນັ້ນ, ສະຫາຍ ລີຊາງກູນ, ກໍ່ຍັງໄດ້ຕີລາຄາສູງ ແລະ ຍົກໃຫ້ເຫັນມູນເຊື້ອແຫ່ງສາຍພົວພັນມິດຕະພາບ ແລະ ການຮ່ວມມືລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ສປປ ເກົາຫຼີ ໃນໄລຍະການຕໍ່ສູ້ກູ້ຊາດ ກໍ່ຄືໄລຍະປົກປັກຮັກສາ ແລະ ສ້າງສາປະເທດຊາດໃນປັດຈຸບັນ.

          ກ່ອນການຮັບຟັງການປາຖະກາຖາ, ຜູ້ເຂົ້າຮ່ວມພິທີ ຍັງໄດ້ຮັບຊົມວີດີໂອ, ຮູບພາບ ການເຄື່ອນໄຫວປະຕິວັດ ຂອງການນຳ ສປປ ເກົາຫຼີ, ເຊິ່ງເຮັດໃຫ້ຜູ້ເຂົາຮ່ວມຮັບຮູ້ ແລະ ເຂົ້າໃຈແຈ້ງຕື່ມກ່ຽວກັບ ພາລະກິດການປະຕິວັດ ກໍ່ຄືການປົກປັກຮັກສາ ແລະ ສ້າງສາປະເທດ ສປປ ເກົາຫຼີ ພາຍໃຕ້ການນຳພາຂອງພັກແຮງງານ ເກົາຫຼີ. ນອກນັ້ນ, ຍັງໄດ້ຮັບຊົມການສະແດງສິນລະປະຂອງສີລະປີນຈາກສະຖານທູດ ສປປ ເກົາຫຼີ ຊຶ່ງເຮັດໃຫ້ພິທີດຳເນີນໄປດ້ວຍບັນຍາກາດເບີກບານມ່ວນຊື່ນ ແລະ ມີຄວາມໝາຍເລີກເຊິ່ງ.