DSC 0845


DSC 0814


ກອງປະຊຸມໃຫຍ່ອົງຄະນະພັກ ສານປະຊາຊົນສູງສຸດ ຄັ້ງທີ III ໄດ້ໄຂຂຶ້ນຢ່າງເປັນທາງການ ແລະ ອັດລົງດ້ວຍຜົນສຳເລັດຢ່າງຈົບງາມ ໃນວັນທີ 04 ຕຸລາ ນີ້, ທີ່ສະໂມສອນໃຫຍ່ອົງການໄອຍະການປະຊາຊົນສູງສຸດ ດັ່ງກ່າວພາຍໃຕ້ການເປັນປະທານຂອງ ສະຫາຍ ຄຳພັນ ສິດທິດຳພາ ກຳມະການສູນກາງພັກ ເລຂາຄະນະພັກ ປະທານສານປະຊາຊົນສູງສຸດ ໂດຍການໃຫ້ກຽດເຂົ້າຮ່ວມຂອງ ສະຫາຍ ພັນຄຳ ວິພາວັນ ກຳມະການກົມການເມືອງ ສູນກາງພັກ ຜູ້ປະຈຳການ ຄະນະເລຂາທິການ ສູນກາງພັກ ຮອງປະທານປະເທດ ແຫ່ງ ສປປ ລາວ ຊຶ່ງມີບັນດາແຂກຖືກເຊີນ ພ້ອມດ້ວຍສະມາຊິກພັກຂອງສານປະຊາຊົນ ເຂົ້າຮ່ວມຢ່າງພ້ອມພຽງ.

ກອງປະຊຸມຄັ້ງນີ້ໄດ້ດຳເນີນໄປເປັນເວລາໝຶ່ງວັນເຊິ່ງກອງປະຊຸມໄດ້ພ້ອມກັນທົບທວນຫວນຄືນເຖິງຜົນງານ ແລະ ໄຊສະນະແຫ່ງການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ II ຂອງອົງຄະນະພັກສານປະຊາຊົນສູງສຸດ 5 ປີຜ່ານມາ, ໄດ້ພ້ອມກັນຄົ້ນຄ້ວາຕົກລົງເປັນເອກະພາບສູງ ຮັບຮອງເອົາທິດທາງໜ້າທີ່, ຈຸດໝາຍສູ້ຊົນແຕ່ນີ້ຮອດປີ 2020 ເຊິ່ງເປັນໄລຍະແຫ່ງການຈັດຕັ້ງ ປະຕິບັດກອງປະຊຸມໃຫຍ່ ຄັ້ງທີ X ຂອງພັກ, ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII ຂອງລັດ. ກອງປະຊຸມຍັງໄດ້ພ້ອມກັນສຳຫຼວດຄືນການຈັດຕັ້ງນຳພາລວມ ຂອງຄະນະບໍລິຫານງານພັກ ສະໄໝທີ II; ກອງປະຊຸມຍັງໄດ້ໃຊ້ສິດ ປະຊາທິປະໄຕ ປ່ອນບັດເລືອກຕັ້ງເອົາຄະນະບໍລິຫານງານພັກ ສານປະຊາຊົນສູງສຸດ ສະໄໝທີ III ເຊິ່ງມີຜູ້ສະໝັກຈຳນວນ 9 ສະຫາຍ ແລະ  ເລືອກເອົາ 7 ສະຫາຍເປັນຄະນະພັກ ໂດຍກອງປະຊຸມຄັ້ງປະຖົມມະລືກຂອງຄະນະບໍລິຫານງານພັກຊຸດໃໝ່ໄດ້ເປັນເອກະສັນເລືອກເອົາ.

-       ສະຫາຍ ຄຳພັນ ສິດທິດຳພາ ກຳມະການສູນກາງພັກ ເປັນເລຂາຄະນະພັກຕື່ມອີກສະໄໝໜຶ່ງ.

-       ສະຫາຍ ຄຳພາ ແສງດາຣາ ເປັນຮອງເລຂາຄະນະພັກ ທັງເປັນປະທານກວດກາພັກ ແລະ ເລືອກເອົາ 5 ສະຫາຍເປັນຄະນະພັກ.

ໃນໂອກາດເຂົ້າຮ່ວມກອງປະຊຸມສະຫາຍ ພັນຄຳ ວິພາວັນ ກົມການເມືອງສູນກາງພັກ ຜູ້ປະຈຳການຄະນະເລຂາທິການໃຫຍ່ສູນກາງພັກ ໄດ້ໃຫ້ກຽດໂອ້ລົມຕໍ່ກອງປະຊຸມ ເພື່ອເປັນເຂັມທິດເຍືອງທາງຕໍ່ທຸກການເຄື່ອນໄຫວວຽກງານຂອງສານປະຊາຊົນໃນຕໍ່ໜ້າ ເຊິ່ງສະຫາຍໄດເນັ້ນເຖິງ 6 ບັນຫາ ທີ່ ສານປະຊາຊົນ ທັງເອົາໃຈໃສ່ເຮັດໃຫ້ດີທີສຸດ ແລະ ມີບາງຕອນສຳຄັນ ສະຫາຍໄດ້ເໜັ້ນໃຫ້ບັນດາ ສະຫາຍຄະນະບໍລິຫານງານພັກ ສານປະຊາຊົນສູງສຸດ ສະໄໝນີ້ ຈົ່ງເພີ່ມທະວີຄວາມສາມັກຄີ ເປັນປຶກແຜ່ນ, ເປັນໃຈກາງໃນການເຕົ້າໂຮມກຳລັງແຮງ ສະຕິປັນຍາຂອງມະຫາຊົນ ເປັນກຳລັງແຮງໃນການນຳພາຂອງອົງຄະນະພັກ, ຍືດໝັ້ນລັກການລວມສູນປະຊາທິປະໄຕ ຂອງພັກ, ນຳພາເປັນໝູ່ຄະນະ, ມີການແບ່ງວຽກ-ແບ່ງຄວາມຮັບຜິດຊອບພາຍໃນຄະນະພັກ ຢ່າງຈະແຈ້ງ ແລະ ໃຫ້ຮີບຮ້ອນນຳເອົາເນື້ອໃນກອງປະຊຸມໃຫຍ່ຄັ້ງນີ້ໄປເຜີຍແຜ່ເຊື່ອມຊືມ ແລະ ປຸກລະດົມຄະບວນການຢ່າງແຂງແຮງ ເພື່ອຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຂອງພັກ ແລະ ມະຕິກອງປະຊຸມໃຫຍ່ຂອງອົງຄະນະພັກ ຄັ້ງທີ III ໃຫ້ມີຜົນສຳເລັດໃຫຍ່ຫຼວງຕາມຄາດໝາຍທີ່ວາງ ໄວ້, ເຊື່ອໝັ້ນວ່າ: ພາຍໃຕ້ການນຳພາຂອງຄະນະພັກ ສານປະຊາຊົນສູງສຸດ ໃນຊຸດນີ້ ດ້ວຍ ບົດຮຽນທີ່ຖອດຖອນໄດ້ ໃນຊຸມປີທີ່ຜ່ານມາບວກໃສ່ ຄວາມສາມັກຄີເປັນບືກແຜ່ນແໜ້ນ ໜາ ແລະ ມີຄວາມຮັບຜິດຊອບສູງຄະນະໜ່ວຍພັກ, ສະມາຊິກພັກ ແລະ ພະນັກງານຂອງ ສານປະຊາຊົນທຸກສະຫາຍຈະຍາດໄດ້ຜົນງານໃໝ່ຍິ່ງໃຫຍ່ ກ່ວາຂຸມປີຜ່ານມາ.