IMG 2709


IMG 2698

     ປະຕິບັດຕາມ ໂຄງການ ພັດທະນາສ້າງລັດປົກຄອງດ້ວຍກົດໝາຍ, ມາໃນວັນທີ່ 27 ມິຖຸນາ ຫາ 1 ກໍລະກົດ 2016 ຢູ່ທີ່ ລ່ອງງື່ມ ເມືອງ ແກ້ວອຸດົມ ແຂວງວຽງຈັນ ຄະນະຮັບຜິດຊອບສ້າງປຶມຄູ່ມືການດຳເນີນຄະດີການຄ້າມະນຸດ ຂອງສານປະຊາຊົນສູງສຸດ ໄດຈັດກອງປະຊຸມດ້ານວິຊາການປະກອບຄຳຄິດ, ຄຳເຫັນໃສ່ ຮ່າງນິຕິກຳດັ່ງກ່າວ ພາຍໃຕການເປັນປະທານຂອງ ທ່ານ ຄຳພາ ແສງດາຣາ ຮອງປະທານສານປະຊາຊົນສູງສຸດ, ຜູ້ຊີ້ນຳວຽກງານວິຊາຊະເພາະ ພ້ອມດ້ວຍຄະນະຮັບ ຜິດຊອບທີ່ມາຈາກ ບັນດາຜູ້ພິພາກສາຂອງສານຂັ້ນລົບລ້າງຂອງສານປະຊາຊົນສູງສຸດ, ມາຈາສະຖາບັນຄົ້ນຄວ້າ ແລະ ຝຶກອົບຮົມ, ບັນດາຜູ້ພິພາກສາຂອງສານປະຊາຊົນພາກກາງ, ສານປະຊາຊົນນະຄອນຫລວງວຽງຈັນ ແລະ ພະນັກງານວິຊາການ ເຂົ້າຮ່ວມຈຳນວນ 20 ທ່ານ. ກອງປະຊຸມໃນຄັ້ງນີ້ຜູ້ເຂົ້າຮ່ວມໄດ້ຕັ້ງໜ້າປະກອບຄຳຄິດ-ຄຳເຫັນຢ່າງກົງໄປ-ກົງມາໃສ່ ຮ່າງນິຕິກຳດັ່ງກ່າວ ລວມມີ 7 ບົດ ເປັນຕົ້ນ: ຄວາມຮັບຮູ້ທົວໄປກ່ຽວກັບການຄ້າມະນຸດ; ການວິເຄາະຄະດີກ່ຽວກັບການຄ້າມະນຸດ; ການດຳເນີນຄະດີການຄ້າມະນຸດຢູ່ສານຂັ້ນຕົ້ນ; ສານອຸທອນ; ສານຂັ້ນລົບລ້າງ; ການປະຕິບັດຄຳຕົກລົງຂອງສານ ແລະ ການຮ່ວມມືສາກົນໃນການດຳເນີນຄະດີການຄ້າມະນຸດ. ກອງປະຊຸມໄດ້ໃຊ້ເວລາ 4 ວັນ ຈິ່ງສຳເລັດ.
     ຜ່ານການຄົ້ນຄວ້າ, ປະກອບຄຳຄິດ-ຄຳເຫັນໄລຍະ
4 ວັນດັ່ງກ່າວ ບໍ່ພຽງແຕ່ເຮັດໃຫ້ ຮ່າງນິຕິກຳ 7 ບົດດັ່ງກ່າວ ມີຄວາມສົມບູນຂຶ້ນຕື່ມເທົ່ານັ້ນ ແຕ່ຍັງເຮັດໃຫ້ຜູ້ເຂົ້າຮ່ວມກອງປະຊຸມມີຄວາມເຂົ້າໃຈເລິກເຊິ່ງຕື່ມອີກ ກຽວກັບ ວຽກງານຕ້ານການຄ້າມະນຸດຢູ່ ສປປ ລາວ ແລະ ມີຄວາມເຫັນທີ່ເປັນເອກະພາບກັນວ່າ ຈະຕ້ອງໄດ້ເຮັດໃຫ້ປຶ້ມຄູ່ມືການດຳເນີນຄະດີການຄ້າມະນຸດສະບັບນີ້ ມີຄວາມລະອຽດ, ເຂົ້າໃຈໄດ້ງ່າຍ ຮັບປະກັບໃຫ້ມີຄວາມຖືກຕ້ອງ ແລະ ສອດຄ່ອງກັບລັດຖະທຳມະນູນ ແລະ ກົດໝາຍ; ປະກອບສ່ວນເຂົ້າໃນການປົກປ້ອງ ສິດ ແລະ ຜົນປະໂຫຽດອັນຊອບທຳ ຂອງພົນລະເມືອງຢ່າງແທ້ຈິງ.